雅虎香港電視

【Now財經台】美股噚晚造好，道指一度創即市新高，高見35669點，而連升6日嘅標指同歷史高位只相差5點。美企業績繼續利好大市，標普500喺噚晚收市前出業績嘅12家公司，其中11家好過預期，個別更比市場預期高近50%，3大指數輪流創新高嘅情況係咪好快再出現？

資深市場人士陸庭龍指，美股3大指數其實喺歷史高位橫行咗一段長時間，之前已陸續出現突破，傳統上投資者喺10月係比較謹慎，依家反而見到喺聯儲局即將「收水」，但又未做呢個動作前，大量資金仍喺股市流轉，如果公司業績繼續交到貨，美股3大指數有機會喺今個月，或者下月初陸續破頂。