雅虎香港電視

【Now財經台】滙豐控股(00005)近年持續剝離非核心業務，早前已完成出售加拿大業務，集團預期，將會喺6月派0.21美元特別股息。集團今日(9日)又宣布，以5.5億美元將阿根廷業務賣畀當地最大私人金融集團Grupo Financiero Galicia，但呢單交易會錄得虧損，市場擔心會影響派息，但滙控已大派定心丸，指唔會影響派息，維持派息比率50%，所以對股價冇乜影響？

華盛證券財富管理部董事李偉傑指，雖然蝕住賣阿根廷業務係負面消息，但對集團盤數影響唔大，但依家賣未必係一個好時機，如果美國今年真係減息，到時美元有機會轉弱，會賣到一個更好嘅價錢。

Jason又話，滙控股價今日不跌反升，主要反映派特別息呢個因素，《彭博》綜合逾20家大行及券商目標價，平均睇約74元，佢認為74元係長線目標，2020年上升通道頂部喺67元水平，短線睇67元至68元，上到呢個位可以考慮先行獲利。