雅虎香港電視

近日有人發現昂船州水域停泊咗一艘超級豪華遊艇，原來係屬於俄羅斯鋼鐵大亨莫爾達紹夫，佢被視為係俄國總統普京嘅盟友，現時被多個歐美國家制裁。 莫爾達紹夫嘅發言人回覆傳媒查詢時話，船主目前喺莫斯科，但不便透露遊艇嘅去向，香港海事處就指，唔評論個別事件，但強調香港政府一直實施及執行聯合國安理會嘅制裁，但個別國家基於自身考慮嘅單方面制裁，香港無權力亦唔會實施。 呢艘超級遊艇被名為「Nord」，價值5.21億美元，長142米，寬19.5米，有6層甲板，設有直升機停機坪、運動及潛水中心。目前多國禁止俄羅斯富豪嘅遊艇停泊，有已停泊嘅遊艇甚至被扣押，所以唔少親俄人士嘅富豪遊艇都轉泊喺亞洲國家。