雅虎香港電視

唔少港人喺疫情期間唔可以番到內地，但證件已經過期，恢復通關之後，要申領續證預約嚴重爆滿，最少等4個月先可以換證。國家出入境管理局宣布，下月8號起延長回鄉證有效期，如果證件有限期由2020年1月1日至今年12月30日，有效期會自動延長至今年12月31日，持證人可以照常用回鄉證返回內地，入境之後到內地相關部門申請換發回鄉證。 工聯會歡迎當局做法，話接到大量市民求助，因為香港換領機構都大排長龍，需求非常迫切，又要求當局打擊黃牛黨問題。中旅證件服務有限公司強調，唔接受任何中介代理人預約受理服務，並提醒市民可以去官網預約辦理手續。